一個醫科生大學畢業後如果想成為專科醫生，就一定要加入醫管局做駐院醫生（極小部分專科除外，例如法醫）。即係你幾唔願意都要幫醫管局打工。其實如果一畢業出嚟喺私營機構做普通科醫生，人工真係高過醫管局好多。但係想做專科醫生，醫管局幾刻薄你都要接受。
政府同埋醫管局好似睇死醫生唔敢有乜反抗，就步步進迫。一方面醫生如果有工業行動就好容易影響到病人，大佬，原本已經唔夠人做嘢架啦。另一方面，如果醫生出嚟話要加人工，其實好難得到傳媒同社會嘅支持，啲人會覺得，「喂，醫生已經好高人工啦，你唔鍾意做咪唔好做囉」「醫生梗係要縣壺濟世，咁貪錢學乜人做醫生」「你唔鍾意咪出私家囉你唔做大把人想做啦」跟住就會話，「都話引入外地醫生㗎啦」
其實香港從來冇阻止過外地醫生嚟執業，只係嚟執業之前要考試（類似香港兩間醫學院嘅畢業試）同埋實習一年。
其實回歸之前，英聯邦國家畢業嘅醫生係唔使考試就可以來港執業。咁如果而家外地醫生可以免試就來港執業，咁究竟係淨係英美澳加嘅醫生可以唔使考試，定係全世界嘅醫生都唔使考試呢？係咪即係大陸嗰啲都得？有冇藉口話大陸嗰啲唔得？以前就話英聯邦嗰啲唔使係理所當然，咁而家呢？我哋同大陸係「一個國家」喎。等陣又話我地歧視佢哋。咁其實我好肯定大陸都有好嘅醫生，但係據我所知，喺大陸讀完醫，考完畢業時再實完習，都仲要考一個執業試先至可以做正式嘅醫生，咁即係大陸醫學院嘅程度，連大陸自己都信唔過，而嗰個試嘅合格率都幾低吓。
至於英美澳加嘅醫生喺嗰邊，過慣咗冇咁忙碌嘅生活，而且居住條件一定比香港優勝，有幾多個會想嚟呢？仲有言語嘅問題呢？有啲人話香港人喺外地所生嘅仔女，讀完醫都返唔到嚟，喂，從來冇話唔俾佢哋返嚟喎，考個試咋喎！醫生都考慣試㗎啦。咁如果連個試都費事考，咁佢會有幾想嚟呢？有啲人話合格率低，係保護主義，咁係咪係人去考都應該俾佢合格？其實考試合格與否有好多因素，例如考生自己嘅水平。
醫生都係人（雖然 on call 完照鏡覺得自己似鬼多過似人），人都係要食飯養家。人工當然係其中一個考慮，尤其喺而家呢個咁惡劣嘅制度，咁惡劣嘅工作環境下。咁當然人工唔係唯一嘅考慮啦，如果係嘅話，我哋使乜仲咁浪費青春喺到爭取嗰3%？晨早辭咗職啦（話時話，幫細路仔補習都可能收入好過而家，仲冇人命責任㖭）。
只於出唔出去私家做，我諗好多同事都有唔同嘅諗法，有啲人係想留喺公立醫院吸取經驗，有啲係唔想自己開診所又要顧埋請姑娘、管藥、管數，想淨係睇症。出去私家亦唔係純粹係經濟考慮。當人手短缺到睇一個病人（就算病例複雜）只係幾分鐘時間，其實有冇辦法照顧到病人真正嘅需要？喺私家診所就會好好多。亦有好多人喺醫管局嘅無能管理下，心灰意冷要離開。
好少寫嘢寫咁長，但係呢次加薪事件，真係令我好嬲，亦都好灰心。陰謀論啲嚟講，政府係咪特登想逼走曬現有嘅醫管局醫生，慳返啲人工呢？
既然政府為3%人工話醫管局同政府唔係掛鈎，不如我哋為3倍人工爭取同私家醫生掛鈎。
公家醫院陳醫生
沒有留言:
張貼留言